Oppgåver og organisering – Statens helsetilsyn

08.02.2012

Del

Lag PDF

Skriv ut

Oversikt over oppgåvene – overordna tilsynsmyndigheit for fylkesmennene

Lovgrunnlag for oppdraget

Overordna departement og oppgåvene for kvart enkelt år

Personale og budsjett.

Intern organisering og ledelse, organisasjonsnummer

Organisasjonskart og organisasjonsnummer

Lenkeliste

Oversikt over oppgåvene – overordna tilsynsmyndigheit for fylkesmennene

Statens helsetilsyn er den sentrale tilsynsmyndigheita for sosiale tenester i Nav, barnevern-, helse- og omsorgstenester. Oppgåvene omfattar:

overvaking av tenesteytinga sett i høve til befolkninga sitt behov for tenester og samfunnet sine krav til tenestene
overordna fagleg tilsynsstyremakt for dei nemnde tenestene
behandling av enkeltsaker som handlar om alvorleg svikt i helse- og omsorgstenestene og der det er aktuelt med pålegg mot verksemder eller reaksjonar mot helsepersonell
styring av den klagesaksbehandlinga som gjeld rett til tenester etter mellom anna barnevernloven, pasient- og brukarrettsloven og helse- og omsorgstenesteloven
formidling av tilsynserfaringar til forvaltninga og tenestene

Fylkesmennene er tilsynsmyndigheit for sosiale tenester i Nav, barnevern-, helse- og omsorgstenester i sine fylke. Fylkesmennene blir styrte i administrative saker (budsjett m.m.) frå Fornyings-, administrasjons- og kirkedepartementet (FAD). Statens helsetilsyn har den faglege styringa. Dette inneber fastsetting av mål og krav innanfor dei rammene departementa set, utvikle metodar og drive opplæring i tilsyn, rettleie om policy og saksbehandling og sjå til at like saker blir behandla likt i heile landet.

Regelverksutvikling, fagutvikling, gjennomføring av politikk (handlingsprogrammer, handlingsplanar, nytt regelverk m.m.) og publikumsinformasjon ligg ikkje i Statens helsetilsyn. For helse- og omsorgstenester ligg desse oppgåvene i Helsedirektoratet.

Lovgrunnlag for oppdraget

Statens helsetilsyn sitt oppdrag går fram av barnevernloven, helsetilsynsloven og lov om sosiale tenester i Nav, sjå under Myndigheit lagt til Statens helsetilsyn. Der finst også lov- eller forskriftsheimel for kvar enkelt sakstype der det vert utøvd myndigheit.

Tilsynsoppdraget for Statens helsetilsyn er gjort greie for seinast i Prop. 91 L (2010-2011) om helse- og omsorgstenesteloven, Ot.prp. nr. 69 (2008-2009) om barneverntenester, Ot.prp. nr. 103 (2008-2009) om sosiale tenester i Nav og Ot.prp. nr. 105 (2001-2002) om endringar i helsetilsynsloven, der det også finst ein gjennomgang av tilsynet.

Overordna departement og oppgåvene for kvart enkelt år

Helse- og omsorgsdepartementet er overordna myndigheit, og Kommunetjenesteavdelingen har etatstyringsansvaret. Arbeidsdepartementet har styringsansvar for oppgåver som gjeld sosiale tenester i Nav og Barne-, likestillings- og inkluderingsdepartementet for oppgåver retta mot barnevernet. Etatstyringa skjer etter "Retningslinjer for virksomhetsstyringen i Helse- og omsorgsdepartementet" fastsett 31. januar 2011.

For kvart enkelt år får Statens helsetilsyn oppdrag gjennom forslaget frå regjeringa til statsbudsjett (Prop.1 S) og Stortinget si behandling av budsjettet (Innst. 11 S) fra Helse- og omsorgskomiteen. Oppdraget vert formidla gjennom tildelingsbrevet frå Helse- og omsorgsdepartementet.

Personale og budsjett

Statens helsetilsyn har ca. 110 tilsette. Utgiftene til drift av Statens helsetilsyn var cirka 94 mill kr i 2011, og løyvingane blir gitt på kap. 721 i statsbudsjettet.

Intern organisering og ledelse, organisasjonsnummer

Statens helsetilsyn har tre avdelingar (sjå lenkelista for nærare omtale):

avdeling for tilsynssaker (avd I)
avdeling for planlagt tilsyn (avd II)
avdeling for fellestjenester (avd III)

Statens helsetilsyn blir leia av direktør Lars E. Hanssen og ass. direktør Geir Sverre Braut. Kommunikasjonsdirektør Nina Vedholm er ein del av leiinga. Leiargruppa består av leiinga og dei tre avdelingsdirektørane, sjå bilete m.m. under Presse. Sekretær for leiargruppa er underdirektør Helge Høifødt.

Organisasjonskart og organisasjonsnummer

Den interne organiseringa i Statens helsetilsyn er slik:

Organisasjonskart Statens helsetilsyn

Lenke til omtale av avdelingane finst i lenkelista. Tilsynsmyndigheitene sin plass i sosial- og helseforvaltninga er vist på organisasjonskart (frå Tilsynsmeldinga 2003).

Organisasjonsnummer for Statens helsetilsyn er 974 761 394.