Njuike váldosisdollui

Fylkkamánnit riikkas čađahedje 2019:s bearráigeahču mánáidsuodjalusbálvalusa doaimmain čuovvolanbálvalusain ja mo mánáidsuodjalus ja NAV ovttasbargaba nuoraiguin geain lea dárbu veahkkái go lávkejit iešbirgejeaddji rávisolbmodillái. Guorahallui addego bálvalusat doarvái ja heivehuvvon dieđuid, láhččojuvvui go geavaheddjiidmielváikkuheapmái, ja leigo áššiin dohkálaš kárten ja árvvoštallan.

Fylkkamánnit čađahedje 33 geahčču. Oktiibuot guorahallui mánáidsuodjalus 49 gielddas ja 37 NAV-kantuvrra guorahallo. Gávdne láhkarihkkumiid 22 geahčus. Láhkarihkkumat ledje juogo nuppi dahje goappašiid bálvalusain.

Máŋgga láhkarihkkumis lei sáhka ovttasbarggus gaskal bálvalusaid. Láhkarihkkumiin lei sáhka sihke váilevaš ovttasbarggus ovttaskasáššiin ja váilevaš stivrejupmi ja láhččin ovttasbarggus oppalaččat.

Fylkkamánnit čujuhedje ahte láhka rihkkojuvvui sihke dan dáfus mo mánáidsuodjalusbálvalus ráhkkanii, árvvoštalai dárbbu, ja čuovvulii ja loahpahii čuovvolanbálvalusa. Viidásat gávnnahedje fylkkamánnit ahte dieđut čuovvolanbálvalusa birra sidjiide geain ledje leamaš eaktodáhtolaš veahkkedoaibmabijut dávjá ledje váilevaččat.

Maiddá sosiálasuorggis gávdne láhkarihkkumiid buot oassesurggiin geahččus. Leat máŋga NAV-kantuvrra mat eai kárte nuoraid dárbbuid vai sii ožžot dohkálaš sosiála bálvalusaid, eaige láže vai nuorat besset váikkuhit iežaset dili ja dárbbu kártemii.

Gielddat fertejit álggahit doaibmabijuid divvut dakko gokko láhkarihkkumat leat čujuhuvvon, Fylkkamánnit galget čuovvut mielde ahte gielddat dahket dan áigemeriid siste mat leat addon. Bearráigeahčču ii sáhte loahpahuvvot ovdal dilit leat ortnegis.