Dán jagi leat guovttis geat leaba áŋgiruššan eamiálbmot- ja unnitálbmotdearvvašvuođas goappátge suorggis geat oažžuba bálkkašumi.

Ola Mathis Hetta

Ole Mathis Hetta leamaš sámi divššohasaide čielga jietna. Son lea moanat jagiid bargan servodatmedisiinnalaš gažaldagaiguin, guovlludoaktárin, suohkandoaktárin, kvalitehtaráđđeaddin ja fylkkadoaktárin.

Olles su doaibmanáiggis lea son áŋgiruššan ahte dearvvašvuođadoaimmahat ferte bures dovdat ja doahttalit sámi giela ja kultuvrra. Sámi divššohasat leat dávjá váldán suinna oktavuođa go sii leat dovdan ahte sii eai gulahala Norgga dearvvašvuođadoaimmahagain.

Hettas lea maiddái riikkaidgaskasaš vásáhus iešguđetlágan dearvvašvuođaprošeavttain Lulli-Sudanas ja Tanzanias.

Dál Ole Mathis Hetta bargá sámi servodatmedisiinnalaš seniroráđđeaddin Dearvvašvuođadirektoráhtas.

Tayyab M. Choudri

Tayyab M. Choudri lea Riikkaidgaskasaš dearvvašvuođa- ja sosiálajoavkku (IHSG) jođiheaddji, maid son álggahii 1990-logus. Joavkkus son lea viidát ovddidan álbmotdearvvašvuođa váttisvuođaid, nugo mielalaš dearvvašuođa, biebmodoalu ja lihkadeami. Son lea maiddái ovddidan eambbo sensitiiva fáttáid, ja leamaš hui čielggas ahte organisašuvdna huksejuvvo olmmošvuoigatvuođa ja dásseárvvu ala.

Riikkaidgaskasaš dearvvašvuođa- ja sosiálajoavku ovttasbargá máŋggain Norgga organisašuvnnain ja eiseváldiin, ja lea doaibman sisafárrejeddjiide kulturjorgaleaddjin geat rahčet gávdnat sajádaga Norgga vuogádagas.

Choudri lea veahkkedivššár oahpu váldán Norggas, ja lea lohkan psykologiija ja álbmotdearvvašvuođa Eŋglánddas.

Karl Evang- bálkkašumi

Karl Evang bálkkašupmi juhkkojuvvo jahkásaččat dakkár olbmui dahje organisašuvdnii gii dahje mii lea erenoamážit áŋgiruššan ovddidit juogo álbmotdearvvašvuođa ja sosiáladili čatnon dasa, riektesihkkarvuođa ja oadjebasvuođa mánáidsuodjalusas, dearvvašvuođa- ja/dahje sosiálabálvalusas, dahje diehtojuohkinbarggu ja oassálastima servodatdigáštallamis dehálaš gažaldagaid birra namahuvvon surggiin. Deattuhuvvo ahte sii geat ožžot bálkkašumi leat áŋgiruššan eanet go vurdojuvvon.

Lávdegoddi mii juohká bálkkašumi lea Stáhta dearvvašvuođabearráigeahčču nammadan.

Gå til toppen