Helsetilsynet

Riikka fylkkamánnit leat čađahan bearráigeahču Buf-etáhta regiovnnalaš sisaváldinovttadagain ja Nasjonalt inntaksteam (NIT)/Natiovnnalaš sisaváldinjoavkku hárrái. Dat mii dárkkistuvvui lei Buf-etáhta veahkehangeatnegasvuohta fáhkkadilálašvuođain ja go ohccojuvvojedje plánejuvvon institušuvdnadoaibmabijut, nugo veahkke- ja fuolahusdoaimmat ja veahkkedoaimmat láhttenváttisvuođaid oktavuođas. Máná mielváikkuheapmi lea leamaš čađačuovvu elemeanta buotlágan doaibmabijuid guorahallamis. Mielváikkuheapmi mearkkaša ahte mánnái juhkkojuvvojit dieđut heivvolaš vuogi mielde ja ahte son oažžu vejolašvuođa ovddidit iežas oainnu. Máná oainnut galget deattuhuvvot dan ektui man boaris son lea ja man muddui lea láddan.

Buf-etáhta galgá jođihit ja dárkkistit iežaset doaimma nu ahte fállojuvvojit heivvolaš doaibmabijut go suohkanat bivdet veahki. Vai gávdnojit heivvolaš doaibmabijut, de ferte Buf-etáhtas leat doarvái diehtu sihke máná dárbbuid ja dilálašvuođa birra, ja áigeguovdilis doaibmabijuid birra. Buf-etáhta ferte dasto konkrehtalaččat árvvoštallat manne árvaluvvon doaibmabidju lea mánnái buoremussan. Máná dilálašvuohta ja dárbbut fertejit leat mearrideaddjin dasa man johtilit veahkkedoaimmat fállojuvvojit. Dán raporttas čoahkkáigessojuvvojit gávdnosat bearráigeahču olis.

Bearráigeahččoraporttat čájehit ahte akuhttagearggusvuohta lea dohkálaš, muhto ahte Buf-etáhtas leat eará surggiin váttisvuođat deavdit veahkehangeatnegasvuođa. Miehtá vuhtto ahte Buf-etáhta ii fuolat ahte mánát besset ieža váikkuhit dalle go doaibmabidjoohcamat gieđahallojuvvojit. Lea maiddái gávnnahuvvon ahte Bufetáhta ii sihkkarastte ahte sis leat doarvái dieđut máná ja máná dilálašvuođa ja dárbbuid birra go doaibmabijut fállojuvvojit.

Buf-etáhta lea bures boahtán johtui ráhkkananbargguin dain surggiin gos láhkarihkkumat leat gávnnahuvvon. Fylkkamánnit galget čuovvolit bearráigeahču bohtosiid dassážii go dilálašvuođat leat njulgejuvvon.

Sammendrag på norsk
Summary in English