«–Dušše okta liige tallearka beavddis?» Čoahkkáigeassu riikkaviidosaš geahčus 2013:s ja 2014:s das movt suohkanat čuovvulit mánáid geat orrot biebmoruovttuin
Dearvvašvuođageahču 1/2015 raportta čoahkkáigeassu
Mánáin geat orrot biebmoruovttuin lea dárbu ja riekti oažžut individuálalaš čuovvuleami mánáidsuodjalusbálvalusas. Sihke mánát ja sin biebmováhnemat dárbbašit čuovvuleami ja bagadallama. Mánáidsuodjalusbálvalusas lea ovddasvástádus das ahte mánát ožžot dohkálaš fuolaheami biebmoruovttus.
Riikka fylkkamánnit leat čađahan geahču oktiibuot 94 mánáidsuodjalusbálvalusas 2013:s ja 2014:s. Dát 94 mánáidsuodjalusbálvalusa ovddastit 151 suohkana. Dán raporttas mii čoahkkáigeassit gávdnosiid.
Fylkkamánnit gávdne boasttuvuođaid 71 mánáidsuodjalusbálvalusas dan 94 geahčaduvvon mánáidsuodjalusbálvalusas. Boasttuvuođat ledje iešguđetlágan surggiin. Ledje stuora váilevašvuođat mánáidsuodjalusbálvalusaid jođiheami dáfus. Dat dagahii ahte mánát ja biebmováhnemat eai ožžon dan čuovvuleami man sis lea riekti oažžut. Raportta čájeha ovdamearkkaid das ahte fitne beare hárve mánáid luhtte biebmoruovttuin, ja ahte mánáin lei beare unnán vejolašvuohta duođas váikkuhit.
Stáhta dearvvašvuođageahčču sihta riikka mánáidsuodjalusbálvalusaid guorahallat raportta gávdnosiid ja árvvoštallat iežaset doaimma ja fálaldagaid dan vuođul.