Njuike váldosisdollui

Váldofállu

Historjjálaš arkiiva Dát sisdoallu lea vurkejuvvon iige ođasmahttojuvvo.

Dát raporta almmuha bohtosiid Stáhta dearvvašvuođageahču  bearráigeahčus mas leat guorahallan dearvvašvuođastašuvnnaid doaimmaid jagis 2011. Raporta addá ollislaš gova das mo suohkanat/gávpotoasit stivrejit dearvvašvuođastašuvnnaid doaimmaid.

Dán bearráigeahčus leat mii guorahallan ovddasteaddji oasi suohkaniin, vihttalogi suohkana, daid gaskkas guhtta gávpotasi Oslos, mo sii vuoruhit, plánejit, čađahit ja njulgejit dearvvašvuođastašuvnnaid fálaldagaid 0-6 jagi mánáide. Čohkkejuvvon bohtosiid ja min árvvoštallamiid vuođđun leat suohkaniid čálalaš vástádusat jearahallanskovis, sáddejuvvon duođaštusat ja lassidieđut seamma suohkaniin, maid leat geahččan ovttas almmolaš statistihkaiguin (KOSTRA) ja SYSVAK  dieđuiguin doaimmaid birra.

Guorahallamiid bohtosat čájehit ahte riikkadásis ledje dearvvašvuođastašuvnnaid doaimmain erohusat sihke sisdoalu ja kvalitehta dáfus. Oppalaččat lei goasii buot guorahallojuvvon suohkaniin heajos ja váilevaš suohkanlaš riskastivrejupmi.

Stáhta dearvvašvuođageahčču oaivvilda ahte dán kártema bohtosat sáhttet leat ávkkálaččat dasa ahte suohkanat váldet bohtosiin oahpu ja ovddidit dearvvašvuođastašuvnnaid kvalitehta. Dát šaddá erenoamáš guovddáš dearvvašvuođa- ja fuolahuslága ja álbmotdearvvašvuođalága implementeremis.

Ávžžuhusat:

  • Stáhtalaš eiseválddit fertejit deattuhit geas lea ovddasvástádus masage iešguđet osiin eastadeaddji dearvvašvuođabálvalusa doaimmain. Dearvvašvuođastašuvnnaid doaimmat dárbbašit čielgasa das, vai sáhttet sihkkarastit iežaset bálvalusfálaldagaid.
  • Suohkanat fertejit systemáhtalaččat gozihit, guorahallat ja čađahit siskkáldas dárkkisteami/stivrejumi dearvvašvuođastašuvnnaid bálvalusaid hárrái, sihkkarastin dihte ahte dat doibmet eavttuid mielde
  • Fylkkamánni berre dan olis go lea dearvvašvuođastašuvnnaid bearráigeahččoeiseváldi, árvvoštallat man muddui sin fylkkas lea dárbu iešguđet suohkaniin čuovvolit guorahallama bohtosiid.

Stáhta dearvvašvuođageahčču doarju Dearvvašvuođadirektoráhta das ahte lea dárbbašlaš áigái oažžut  ođđa dahje viidát statistihka dearvvašvuođastašuvnnaid doaimmaid hárrái, danne go guorahallamis lea čájehuvvon ahte dieđut mat leat gávdnamis KOSTRA bokte, eai leat doarvái luohtehahttit.