Dieđihanguovddáš – 2008-2011 čoahkkáigeassoraporta
Dearvvašvuođageahču rapportta 4/2012 čoahkkáigeassu
Dán raporttas ovdanbuktá Stáhta dearvvašvuođageahčču bohtosiid maid lea gávnnahan go lea guorahallan 7756 dieđáhusa sávakeahtes dáhpáhusaid birra mat leat dáhpáhuvvan pasieanttaide erenoamášdearvvašvuođabálvalusa divššu olis, mat leat raporterejuvvon geahččoeiseválddiide ja registrerejuvvon Dieđihanguovddážii áigodagas 2008 rájes 2011 rádjái.
Deháleamos gávdnosat 2008-2011 áigodagas leat:
- 7756 dieđáhusa registrerejuvvojedje Dieđihanguovddážis.
- 1456 dieđáhusa ledje eahpelunddolaš jápmima birra – 19 proseantta dieđáhusain.
- 20 proseantta buot dieđáhusain guske dáhpáhusaide psykalaš dearvvašvuođasuodjalusa oktavuođas. 44 proseantta dáin dieđáhusain guske eahpelunddolaš jápmimiidda.
- Dieđáhusat mat gusket jápmimiidda iešsorbmema geažil lassánedje 76 dieđáhusas 132 dieđáhussii, 2008 rájes 2011 rádjái. Measta visot dát dieđáhusat bohte psykalaš dearvvašvuođasuodjalusas, muhto moadde bohte somáhtalaš dearvvašvuođabálvalusas.
- 14 proseantta buot dieđáhusain guske boasttuvuođaide dálkasiid oktavuođas.
- 11 proseantta buot dieđáhusain guske dáhpáhusaide gahččama oktavuođas.
- 8 buot dieđáhusain gusket dáhpáhusaide riegádahttima oktavuođas.
- Dieđáhuslohku daid iešguđetge fylkkaid dearvvašvuođageahčuin lei hui iešguđetge ládje. 27 proseantta buot dieđáhusain (2112 dieđáhusa) registrerejuvvojedje Oslo ja Akershus Dearvvašvuođageahčus.
- 7 proseantta buot dieđáhusain čuovvoluvvojedje fylkkaid Dearvvašvuođageahču bealis dan bokte ahte ásahuvvui geahččoášši, eanas háviid doaimma ektui. Hui unnán áššit mielddisbukte geahččoášši dearvvašvuođabargiid ektui.