Dearvvašvuođastašuvdna - Veahkki áiggebále? Dearvvašvuođastašuvnnaid riikkaviidosaš geahčču 2013

Mánáid dearvvašvuođa ja ovdáneami dáfus lea hui dehálaš dustet váttisvuođaid árrat. 2013:s čađahedje fylkkamánnit riikkaviidosaš geahču dearvvašvuođastašuvnnaid bálvalusaid hárrái mánáide gaskal 0–6 jagi. 78 dearvvašvuođastašuvnna suohkaniin ja gávpotosiin iskojuvvojedje. Dáid gaskkas gávnnahedje fylkkamánnit  unnimusat ovtta láhkarihkkuma 56 stašuvnnas.

Dearvvašvuođastašuvnna iskkadanprográmma váilevaš čađaheapmi
Dearvvašvuođadirektoráhta dearvvašvuođastašuvdnaguovllu našuvnnalaš fágalaš bagadus ávžžuha čuovvut dearvvašvuođaiskkademiid prográmma. Fylkkamánnit konstaterejedje ahte olu suohkaniin lei ráddjejuvvon prográmma ja/dahje ledje časkán oktii iskkademiid - almma doarvái medisiidnafágalaš árvvoštallamiid ja dárbbašlaš vástideaddji doaibmabijuid haga.

Váilevaš ovttasbargu mánáid dáfus geain leat erenoamáš dárbbut
Geahčču fuomášii eahpečielga ovddasvástádusjuoguid, váilevaš šiehtadusaid ja váilevaš ovttasbargorutiinnaid dearvvašvuođastašuvnnaid ja fástadoaktáriid gaskka njealjádasoasis suohkaniin. Dákkár váilevašvuođat sáhttet dagahit ahte mánná báhcá guovtti ilmmi gaskii ja ii okta ge váldde čuovvulanovddasvástádusa.

Váilevaš journáladeavdin
Muhtun suohkaniin devdojuvvojedje journálat iešguđet ládje, ja journálanotáhtat ledje dávjá dievasmeahttumat. Journála oasit sáhtte devdojuvvot iešguđet báikkiin, ovdamearkka dihte fástadoavttirkantuvrras, almma dan haga ahte dearvvašvuođastašuvdna oaččui kopiija.

Persovdnasuddjen rihkkojuvvo
Dieđut váhnemiid dearvvašvuođa ja priváhtaeallima birra čállojuvvojedje máŋgga báikkis máná journálii, maiddái oktavuođain gos dieđut eai lean njuolgut áigeguovdilat máná dearvvašvuhtii ja fuolahussii. Dákkár dieđuid sáhttá mánná beassat lohkat go šaddá rávisolmmožin.

Váilot dohkálaš dulkonbálvalusat
Geahčču gávnnahii ahte muhtun dearvvašvuođastašuvnnat geavahit bearašlahtuid, ustibiid ja earáid dulkan. Dalle ii sáhte leat vissis das ahte dehálaš dieđut ipmirduvvojit riekta, ja priváhtaolbmot geain ii leat jávohisgeatnegasvuohta, sáhttet oažžut dieđuid maid eai galggaše oažžut fulkkiid ja ustibiid birra.