”Mii čuvget, šaddat dihtomielalaččat ja fertet iežamet doaimma čavgestit vel eambbo...” Deskriptiiva iskkadeapmi suohkanlaš dearvvašvuođa- ja fuolahusbálvalusain boarrásiidda
Dearvvašvuođageahču raportta 6/2013 čoahkkáigeassu
Eanas suohkanat atnet Fylkkamánni 2010 ja 2011 bearráigeahču dearvvašvuođa- ja fuolahusbálvalusain boarrásiidda buorren vuođđun buoridit iežaset barggu. Dan čájeha deskriptiiva iskkadeapmi man Agenda Kaupang čađahii Stáhta dearvvašvuođageahču ovddas 2012 čavčča. Oktiibuot 325 suohkanii sáddejuvvui elektrovnnalaš jearahallanskovvi dan birra makkár váikkuhus bearráigeahčus lea leamaš. 220 suohkana (68 proseantta) vástidedje. Dasa lassin leat doaimmahagaid jođiheaddjit, ráđđeolbmát ja mielbargit 10 suohkanis jearahallojuvvon telefovnna bokte.
Snoagga 90 proseantta doaimmahagain vástidedje ahte dialoga fylkkamánniiguin ja bearráigeahččoraporta oktiibuot leat addán buori vuođu suohkana bargui buoridit bálvalusfálaldaga hejoš boaresolbmuide. Doaimmahagat lohket ahte bearráigeahčču lea dagahan sin eambbo dihtomielalažžan ja addán rávvagiid buoridan- ja rievdadanbargui. Lea illudahtti oaidnit ahte doaimmahagat oaivvildit dan ležžet dál fuomášuvvon láhkarihkkumat dahje eai.
Áigodagas 2009-2012 čađahedje Stáhta dearvvašvuođageahčču ja fylkkamánnit 4-jagi bearráigeahču bálvalusaid hárrái boarrásiidda. Bearráigeahču loahpas háliideimmet vel iskat makkár proseassaid ja doaimmaid suohkanat álggahedje ja lei go mihkke mii dagahii váttisin geavahit bearráigeahču bohtosiid bálvalusaid buorideapmái. Suohkanat bivdojuvvojedje maiddái buktit oainnuid dasa mo bearráigeahčču sáhtášii leat konstruktiiva veahkki suohkanlaš dearvvašvuođa- ja fuolahusbálvalusaid buorideamis.
Suohkaniid vástádusain oaidnit ahte leat erenoamážit guokte beali mat berrejit leat láidesteaddjin Stáhta dearvvašvuođageahču ja fylkkamánniid barggus boahtteáiggi bearráigeahčuin:
- Systemáhtalaš bargu riskaárvvoštallamiiguin bearráigeahču temáid válljemis dagahii ahte suohkanat oidne bearráigeahččotemáid áigeguovdilin ja mearkkašahttin sin doibmii.
- Dialoga fylkkamánniid mielbargiiguin ja sin gelbbolašvuohta ovddidii rievdadusbarggu.