Helsetilsynet

Áigodagas 2015–2018 dárkkistii Stáhta dearvvašvuođageahčču riikka donašuvdna­buohcci­viesuid ja transplanta­šuvdna­doaimma. Dearvvašvuođa­geahčču gávnnahii ahte dearvvašvuođadoaimmahagaid jođiheaddjit ledje iešguđetge muddui systemáhtalaččat stivren orgánaid addima ja/dahje transplanta­šuvnna (sirdima). Bearráigeahču čielga boađus lea ahte sihke donašuvdna­ovddas­vásti­deaddji doaktárat, donašuvdna­ovddas­vástideaddji buohccidivššárat, transplanta­šuvdna­koordináhtorat ja resursaolbmot buori muddui válde iešheanalaš ovddas­vástádusa alcceseaset gullii doaimmain. Mii gávnnaheimmet ahte guoskevaš dearvvaš­vuođa­bargit maiddái fuolahedje donašuvdnadoaimma dearvvašvuođa­doaimmahagain gos ledje váilevaš, dahje eai oba lean ge njuolggadusat dáid doaimmaid hárrái.

Orgánadonašuvdna ja transplantašuvdna ii galgga čađahuvvot soaittáhagaid mielde, ii ge galgga leat ovttaskas olbmuid duohken. Njealji dearvvaš­vuođa­doaimma­hagas lei nu váilevaš jođiheapmi ja stivren doaimmaid hárrái mat čađa­huvvo­jedje orgánadonašuvnna ja/dahje transplantašuvnna oktavuođas, ahte Dearvvašvuođa­geahčču árvvoštalai dilálašvuođaid rihkkut lága dahje láhkaásahusa.

Dearvvašvuođageahčču gávnnahii váilevašvuođaid čuovvovaš čuoggáin doaimma jođiheamis ja stivremis dan njealji dearvvašvuođa­doaimma­hagas:

  • plánen ja organiseren
  • ráhkadit rutiinnaid ja njuolggadusaid donašuvdnabuohcciviesuid ja/dahje transplantašuvdnadoaimma organiseremii
  • čilget mat leat donašuvdnaovddasvástideaddji buohcci­divššára, donašuvdnaovddasvástideaddji doaktára ja vejolaš eará guoskevaš bargiid doaimmat, ovddasvástádus ja váldi
  • čuovvolit ja dokumenteret oahpaheami ja gelbbolaš­vuođa
  • systemáhtalaččat ja jeavddalaččat dárkkistit donašuvdnabuohcciviesu/transplantašuvnna doaimma