Bákku geavaheapmi mánáidsuodjalusásahusain

Raporta lea joatkka Dearvvašvuođabearráigeahču raporttas bákku geavaheami birra mánáidsuodjalusásahusain, bákku geavaheami birra jagiid 2017 ja 2018. Raporta čoahkkáigeassá fylkkamánni bákku geavaheami registrerema, ja bákku geavaheami váiddaáššiid riikkadásis 2019:s. Dearvvašvuođabearráigeahču bajilgovva čájeha ahte bákku geavaheapmi lassánii čiežain proseanttain riikkadásis gaskal 2018 ja 2019. 2017 rájes 2019 rádjái lea registrerejuvvon mearrádusaid lohku lassánan 16 proseanttain.  Dávjjimusat registrerejuvvon bággošlájat leat gárrenmirkoiskkadeapmi, bággu fáhkka várradilálašvuođain ja lobi ráddjen beassat lihkadit. Dearvvašvuođabearráigeahčču lea maiddái čađahan kártema riikka fylkkamánniid gaskkas daid mánáid hárrái geaidda bággu eanemusat čuohcá fylkkain. Raporta čuvge maiddái man olu bággu geavahuvvo iešguhtege mánnái.

Fylkkamánnit gieđahalle 579 váiddaášši mat guske bákku geavaheapmái 2019:s riikadásis. Dat lea sullii 9 proseantta mearrádusain mat leat registrerejuvvon riikkadásis. Ledje18 proseantta riikkadási áššiin main váidi oaččui mieđáhusa fylkkamánniin. Gieđahallojit eanemus váiddaáššit mat gusket fáhkka várradilálašvuođain, ja leat maiddái dát áššit main váidi  dávjjimusat oaččui mieđáhusa fylkkamánniin.

Dearvvašvuođabearráigeahču beroštupmi lea ahte mánát mánáidsuodjalusásahusain galget vásihit váiddaortnega ávkkálažžan.  Jus mánáid duođaid galget váidit, de lea mearrideaddji ahte sii dovdet sin váldojit duođas go oaivvildit ahte bággu maid ásahus lea geavahan, lea leamaš lobiheapmi. Bággu lea stuorra sisabáhkken, ja oažžut sorjjakeahtes ásahusa árvvoštallat lea go ásahus dahkan riekta vai ii, lea deaŧalaš.  Dearvvašvuođabearráigeahčču oaivvilda ahte berre leat viiddis digaštallan buot mánáidsuodjalusa doaimmaheddjiid gaskkas leago váiddaortnet doarvái buorre ja doaimmahuvvo go dakkár vuogi mielde mii lea heivehuvvon mánáide mánáidsuodjalusásahusas.