Čoahkkáigeassu

Dearvvašvuođaeiseváldi válljii ekonomalaš rávvagiid fáddán riikkaviidosaš bearráigehččui 2024:s ja 2025:s. Stáhtahálddašeaddjit guorahalle, ahte addet go Nav-kantuvrrat ekonomalaš rávvagiid olbmuide, geain lei váttis ekonomalaš dilli ja geat dárbbašedje bálvalusa.

Unnit rihkkumat go ovddit riikaviidosaš bearráigeahčuin sosiálabálvalusain Nav:s

Stáhta hálddašeaddjit gávnnahedje unnit rihkkumiid dán riikkaviidosaš bearráigeahčus go ovddit bearráigeahčuin sosiálabálvalusain Nav:s. Dearvvašvuođaeiseváldi oaivvilda, ahte dát sáhttá čadnojuvvot dasa, go Bargo- ja fuolahusdirektoráhtta ja stáhta hálddašeaddjit leat máŋggaid jagiid fállan Nav-kantuvrraide gelbbolašvuođahuksendoaibmabijuid.

Bearráigeahčus ledje mielde 68 Nav-kantuvrra. Dain 44:s gávnnahuvvui unnimusat okta rihkkun – mii vástida 65 proseantta dárkkistemiin. Rihkkumat gávdnojedje buot golmma guorahallojuvvon oasis bálvalusproseassas: beasatlašvuođas, mearrádusas ja álggaheamis, ja čuovvoleamis. Kantuvrrat válljejuvvojedje stáhtahálddašeaddjiid dieđu vuođul eahpelihkostuvvama riskkaid birra, ja bohtosat eai leat danne ovddasteaddjit buot Nav-kantuvrraide.

Nav-kantuvra ii álo váldán vuhtii dárbbu ekonomalaš rávvagiidda

Bearráigeahčču čájeha, ahte ekonomalaš rávvagiid dárbu ii álo fuomášuvvo doarvái árrat, ja ahte veahkki ii álo álggahuvvo jođánit. Ovddasvástádusat ja barggut iešguđet doaibmabidjodásiin leat eahpečielgasat máŋgga sajis; erenoamážit bálvalusa álgooassi čájeha leat rášši. Hástalusat bálvalusas gusket erenoamážit doaibmabidjodássái 1 ja 2, namalassii dan oassái bálvalusas, mii galgá gávnnahit ja gieđahallat álkit ekonomalaš váttisvuođaid. Ekonomalaš váttisvuođaid ferte geahččat geavaheaddji eará dili oktavuođas, ja máŋga bearráigeahččanraportta čájehit, ahte mánáid dárbbut eai systemáhtalaččat árvvoštallojuvvon áššiin mat guske mánnabearrašiidda. Raporttas deattuhuvvo guktuid hálddašangelbbolašvuođaid mearkkašupmi, sosiálabarggu čuovvoleapmi ja máná buoremusa árvvoštallamat.

Mearrádusa haga šaddá eahpečielggasin makkár veahki geavaheaddji oažžu, ja sus váldojuvvo eret vejolašvuohta váidit.

Máŋggat rihkkumat guske hálddahuslaš gáibádusaide. Nav-kantuvrrat eai álo dahkan mearrádusaid ekonomalaš rávvagiid birra eaige álo dokumenteren čuovvoleami geavaheaddji dieđuide. Mearrádusa váilun sáhttá dagahit, ahte geavaheaddjái ii leat čielggas makkár veahkki lea addojuvvon ja hehtte geavaheaddjái vejolašvuođa váidit. Váilevaš dieđuid dokumenteren hehtte oaidninvejolašvuođa ja dagaha jođiheapmái váddáseabbon bearráigeahččat bálvalusa.